समाचार खोज्नुहोस

महेन्द्रनगर,   विगत वर्षझै यस वर्ष पनि विभिन्न विद्याको छात्रवृत्तिमा नाम निकाल्न सफल विद्यार्थीहरुलाई मर्निङ ग्लोरी माध्यमिक विद्यालयले सम्मान गरेको छ । 
कक्षा ११÷१२ मा अध्ययन गरी यसवर्ष एमबिबिएस, नर्सिङ तथा आयुर्वेद डाक्टर अध्ययनका लागि छात्रवृत्तीमा नाम निकालेका विद्यार्थीहरूलाई बधाई तथा सम्मान कार्यक्रम गरेको हो ।
कार्यक्रममा एमबिबिएस डाक्टर पढ्न छात्रवृत्तिमा नाम निकाल्न सफल प्रकृति जोशी, हार्दिक सुनार र दिपक जोशी तथा बीएस्सी नर्सिङमा  डम्मरा बोहरा र आयुर्वेदिक डाक्टर अध्ययनमा निरुता मिश्रलाई खाँदा सहित टिका लगाएर सम्मान गरिएको थियो । 
कार्यक्रममा पृथ्वी राज भट्टले विद्यार्थीहरूको उज्वल भविष्य र प्रगति कामना गर्दै शुभकामना मन्तव्य राखेका थिए । उनले सबै विद्यार्थीलाई मनैदेखि बधाई ज्ञापन गर्दै छात्रवृत्तिमा नाम निकाल्नु जीवनको परीक्षाको पहिलो खुट्किलो भएकाले अझै पनि कडा मिहिनेत गर्न विद्यार्थीहरुलाई आग्रह गरे । 

विद्यालयका प्रिन्सिपल चुडामणी शर्माले आफ्नो आमा बुबाको र आफ्नो सपना साकार गर्न र विद्यालयको गरिमालाई अझै माथी राख्ने कार्य गरेको प्रती विद्यार्थी सबैलाई धन्यवाद दिए । विद्यार्थीले गरेको सफलताले विद्यालयको गरिमा बढेको उल्लेख गर्दै विद्यार्थीहरुले विद्यालयको शाख निरन्तर राख्ने उनले आशा व्यक्त गरे ।
विद्यालयका कोर्डिनेटर सुनिल ठाकुरले कार्यक्रमको बारेमा जानकारी प्रस्ट पार्दै विद्यार्थीहरूलाई बधाई दिएका थिए । त्यसै गरी विद्यालयका सञ्चालक समिति अध्यक्ष केशव चन्दले पनि विद्यार्थीहरूलाई बधाई दिँदै विद्यालयको 
गरिमा थप बढेकामा सबै विद्यार्थीहरुलाई धन्यवाद व्यक्त गरे ।
मर्निङ ग्लोरीबाट प्लस टु अध्ययन गरेका १५ जना विद्यार्थी पूर्ण छात्रवृत्तिमा एमबिबिएस डाक्टर पढिरहेका छन् ।
यो विद्यालयबाट प्लस टू गरेका १३ जनाले भेटेरीनरी डाक्टर पढेका छन् । त्यसैगरी २ जनाले सिए गरिसकेका छन् भने इन्जिनियरिङ, बिएससी नर्सिङ, फोरेष्ट्री, र आयुर्वेदिक डाक्टरमा गरी सयौ विद्यार्थी छात्रवृत्तिमा अध्ययन गरिरहेकी छन् । २०६२ मा स्थापना भएको स्कुलले २०७१ देखि विज्ञान विषयको अध्ययन सुरु गरेको थियो ।
कक्षा ११ मा विज्ञान विषय अध्ययनरत विद्यार्थी प्रियाञ्जल गहतराजले शुभकामना मन्तव्य राखेका थिए । प्रिन्सिपल चूडामणि शर्माले सञ्चालन कार्यक्रममा विद्यालय व्यवस्थापन समितिका अध्यक्ष केशव बहादुर चन्द, विद्यालयका शिक्षक पृथ्वी  भट्ट, स्कूलका कोर्डिनेटर सुनिल ठाकुर, पूर्व प्रिन्सिपल लक्ष्मी महरा लगायत अन्य शिक्षक कर्मचारीहरुको उपस्थिती रहेको थियो ।